Al Liamm niverenn 473

Fonnus eo taolenn niverenn ziwezhañ ar bloaz Al Liamm. Peadra da veajiñ, da brederiañ, da zeskiñ…

Gant ar barzhonegoù ez eer da gentañ da bourmen en natur dre Ar wenojenn a gas da benn all ar park, gant Mai-Ewen. Donoc’h e kas Herve Bihan ennomp gant Stelennoù, ha bamet e chom R.J. Kernoa dirak he zammig bro e Ra vevo ar Groazig.

Da gouesket bremañ ! Sed aze ar ganaouenn savet gant Gwendal Le Ruyet, da ganañ d’ho pugale p’emañ o noziñ.

En amzer-dremenet e vez beajet en danevelloù kinniget en niverenn-mañ. E Beuzet evit ar Vro villiget e kas Herve ar Gall soñj deomp eus ar pezh a oa c’hoarvezet gant an dud skrivet o anv e monumant ar re varv Groñvel. An dianav a rog ac’hanon, gant Jo an Duigou, a ra al liamm etre Anna Vreizh bet goulennet ganti ma chomfe he c’halon e Breizh ha petra eo bezañ Breizhad pe Vreizhadez hirie an deiz. Lan Tangi a ro deomp un tañva eus pegen luziet e oa an traoù e penn-kentañ ar bloavezhioù 1940, gant Komandant Boticelli ha ne ouier ket re eus peseurt tu e oa d’ar mare-se. En ur bed, pe c’hoazh ur mare ma oa bev-mat an Doueed war an Douar e kas ac’hanomp Cherm ar Bloaz, gant Bleizez war-neñv, ur seurt kontadenn kentelius ha kriz war un dro. Evit echuiñ al lodenn-mañ e kinnigomp deoc’h (ad)lenn Puñs ar fur, gant Paskal an Intañv, e zanevell bet priziet er bloaz-mañ gant ti-kêr Karaez.

El lodenn Istor sokial ar brezhoneg e laka Erwan Hupel war wel, just a-walc’h, penaos e vez troet ar vrezhonegerien da skrivañ diwar-benn an Istor. Dizoloit, gant Istor ar romantoù… istor, penaos ar skrivañ a c’hall stourm a-enep an ankounac’h.

Gant Youenn Kaloneg e tistroer da vare ar Romaned. Gant Taolenn Peutinger e tispleg deomp, ar wech-mañ, penaos e oa bet krouet ar gartenn divent-se.

Skrid pe skeudenn ? Sed aze ur goulenn pouezus a glask Fulup Lannuzel kaout un tamm preder warnañ. D’ur mare ma tremener kement a amzer dirak ur skramm ez eo poent en em soñjal un tamm war an implij hon eus anezhe.

Un danevell fentus eo a lenner diwar dorn Saki (Hector Hugh Munro), troet gant Jean-Michel Mahé. Louise a gont deomp, gant kalz a vousfent, istor Jane Thropplestance, brasañ penn skañv ar Middlesex, o klask war-lerc’h he nizez, ankouaet-mik ganti !

Da vare Gouel al Levrioù e oa bet roet priz Langleiz da Iwan Couée. Ur brezegenn fromus en doa disklêriet ha kaset deomp war-lerc’h. Prezegenn-drugarekaat e sigur Priz Langleiz 2025 a c’haller lenn neuze en niverenn-mañ.

Da-geñver kantvet deiz-ha-bloaz krouidigezh Gwalarn hon eus diskoachet un diell nevez. Gwalarn, bet skrivet gant Per Denez e 1950, a lâr deomp peseurt efedoù a oa bet gant al lusk-se 25 bloaz goude e c’hanedigezh. El lodenn Dielloù eo bet lakaet ivez un destenn skrivet e 1934 e-barzh ar gelaouenn Feiz ha Breiz, gant Roparzh an Aodig : Ar brezhoneg er skolioù. Diskoachet eo bet gant Paskal Tabuteau a zispleg deomp pegen taer e vez c’hoazh ar Stad c’hall e-keñver yezhoù all he ziriad.

Adkavout a reer, e fin an niverenn, an Heklev sevenadurel. Pennadoù-barn al levrioù (A-dreuz lenn, Petra nevez ?), pe an Notennoù diwar-benn buhez sevenadurel hor bro.

Lennadenn blijus deoc’h ha gouelioù laouen !

Skipailh Al Liamm